Møen/Helleberget i Voss kommune - driftskonsesjon

Direktoratet for mineralforvaltning med Bergmeisteren for Svalbard (DMF) viser til søknad om driftskonsesjon etter minerallova § 43 frå Knut A. Møen.

Tiltakshavar skriv i driftsplanen at uttaksområdet for steinbrot og andre vesentlege terrenginngrep er på om lag 80 daa. Område for steinbrot er på om lag 55 dekar. Totalt volum er anslått å vere ca. 1 000 000 m³ (om lag 2 800 000 tonn). Ifylgje driftsplanen vil det årlege uttaket på Møen/Helleberget vere om lag 30 000 tonn, noko som svarar til om lag 10 714 m³.

Ifylgje driftsplanen vil utgangspunktet for drifta på Møen/Helleberget vere kvartsskifer. Førekomsten er dekt av løsmassar, kor det mot øst blir aukande overfjell som består av fyllitt/glimmerskifer. Tiltakshavaren beskriv i driftsplanen at skiferlaget fell med om lag 40 grader inn mot fjellet og at skiferlaget er opp mot 60 meter tjukt.

Området er i noverande kommuneplan avsett til råstoffutvinning og bandlagt for regulering. Voss kommune gav den 22. desember 2014 eit mellombels løyve for at tiltakshavaren kunne halde fram med drifta i skiferbrotet på Møen/Helleberget. Ifylgje tiltakshavaren pågår det ein prosess og arbeid med reguleringsplan for området. Denne er førebels ikkje vedteken.

Saka ligg no ute til høyring. Høyringsdokumenta er tilgjengeleg i menyen til høgre.

Høyringsbrevet gjev nærare orientering om DMF sine forventingar til høyringsfråsegnene og handsaminga vår av søknaden.